المجموعة : باسم الهوا والشّمس والبلاجات
باسم الشّباب والحب والأجازات
باسم الرّاكت واسم المراجيح
باسم الشّقاوه والتفاريح
فتحت الجلسه ..
الحاجب : محكمه
عادل بن كمال
حليم : طالب تصييف ..
القاضي : تقدّم يا فتي
حليم : قاضي البلاج يا قاضي مشتاق من الصّيف الماضي
وجيت علي الحبايب لقيت مكاني فاضي مستنـّيني يا قاضي
القاضي : طالب تصيّف يا فتي؟
حليم : واتمنـّي اصيّف صيف شتا
القاضي : إرفع دراعك واحلف يمينك وقول دفاعك
حليم : وحياة مذاكرة طول العام اللي جابت لي صداع وزكام
ما نجحت ولا شفتك يا نجاح إلا عشانك يا أجازه
وانا وحبايبي والأفراح ناخد من الدّنيا أجازه
والأمر لك يا قاضي والحكم لك يا قاضي
القاضي : النيابه
النيابه : يمنع سنتين من التصييف لا بلاج ولا عوم ولا تجديف
ويقوم في قطر العصر يرجع حالا علي مصر
حليم : جنايتي إيه وذنبي إيه
المجموعه : جنايته إيه وذنبه إيه؟
النيابه : لبس مايوه قبل ما نسمح له بلبس مايوه
المجموعه : يوه يا لطيف
النيابه : لا جاب معاه تورته ولا حتي جاتوه
المجموعه : يوه يا حفيظ
القاضي : المحلـّفون .. مصيف ..غير مصيف.. مصيف .. غير مصيف
حليم : بقي يعني أسيب ماما وبابا واهرب م البيت أبو بوّابه
ما اعرفش اتمتـّع بأجازه والنـّبي يا تلامذه احنا غلابه
المجموعه : والنبي يا تلامذه احنا غلابه
الحاجب : محكمه
القاضي والمجموعه : من فحص قانون البلاجات فرع التصييف والأجازات
ومراجعة كل البيانات قرّرنا ما هو آت
المجموعه : يمنح لقب مصيّف من الدّرجه الأولي تكييف
هيه هيه أدلق الجردل أدلق أدلق قم فأنت مصيّف عظيم
وقد خلعنا عليك الكسوه الصيفيّه ووليّناك أمر الرّعيّه البلاجيّه
خلع القاضي لبس القاضي يحيا القاضي يعيش القاضي
الحاجب : محكمه .. ظروف عائليّه أمور عاطفيّه مشاكل منزليّه عقد نفسيّه حل
عقدك وصيّف
المجموعه : قاضي البلاج يا قاضي يا ابو حكم سيفه ماضي
طول البلاج وعرضه ح نفرش لك قواضي واحكم بقي يا قاضي
قاضي يا قاضي ..لأ أنا قبلك أنا مستعجل واحد واحد يا زباين
فتاة : أنا خدت الإعداديّه بعديها التوجيهيّه وصبحت جامعيّه
وفاضلـّي ع التـّخرّج مش أكتر من سنه تدّيني كام سنه ؟
حليم : وايش عرّفني أنا
الفتاة : أمّال قاضي ازّاي ؟
حليم : أفتي كل الفتوات واعرف في اللوغاريتمات
والنسبيّه والذرّه إلا عمر السّتات
الفتاة : إيه رأيك عمري سبع سنوات
حليم : سبع سنوات ؟
الفتاة : ماما وبابا فاكرين عمري ما ح اكبر وابقي تمن سنوات
بيعاملوني زي ما كنت زمان في الرّوضه بفيونكات
المجموعة : تربيت تربيت تتات ع الحلوه ام فيونكات
الحاجب : محكمه
الفتاة : كل حياتي عيب ما تردّيش ما تعانديش إمتي أحس امّال بوجودي
إمتي أعيش عايزه أعيش ماما وبابا دقـّه قديمه
الحاجب : محكمه
حليم : من فحص قانون البلاجات فرع العائلات والخلافات ومراجعة كل البيانات
قرّرنا ما هو آت ... يحوّل أمرها لوليّ أمرها يعدّل عمرها من سبعه ألي خمس سنوات
فتي : قاضي البلاج يا قاضي عاشق وجيبي فاضي
حليم : بتحبّها ؟
الفتي : حب عباده
حليم : وهيّه ؟
الفتي : زيّ وزياده وجالها واحد يخطبها أبوها وافق كالعاده
المجموعه : من مسرح العرايس روح اسرق لك حصان
واخطفها واجري بيها ولا فرسان زمان
حليم : سارق خطـّاف لفـّوه في لحاف ودّوه الخانكه بالتلـّغراف
فتاة : أمّا أنا طول عمري ما ح اتجوّز ولا اقول يا جواز
من صغري باشوف ماما وبابا كبريت والجاز
فتي : وانا برضه باحب العزوبيّه علشان حريّه ف حريّه مش أخلـص م البيت
والجامعه ومراتي تتحكـّم فيّا
المجموعه : رجّاله بدون جواز شبابيك من غير قزاز ... هس
فتي : أمّا أنا مشكلتي جد الجد
فتي آخر : وانا عندي مشاكل مالها عد
حليم : شطـّبنا
الحاجب : شطـّبنا
المجموعه : وبقيّة مشاكلنا يا قاضي
حليم : تتأجّل للصّيف الماضي
وبعد ما استتب الأمر بين المصيّفين والمصيّفات
وحلـّينا عقد المعقـّدين والمعقـّدات ننشد النشيد
المجموعة : عاش الشّباب كل الشّباب
كلمات: مرسي جميل عزيز
ألحان: منير مراد
مقام: تاريخ: 1969